- HAZIk CAPRICE II Europako proiektuaren esparruan bultzatzen duen ekintza da, txakolina eta Euskal Sagardoa ekoizten duten zazpi upategiren parte-hartzearekin, Japoniako merkatuan duten posizionamendua sendotzeko
- Ekimenak Tokion egindako Discover Basque Wine sustapen-ekitaldia eta inportatzaileekin eta sektoreko profesionalekin merkataritza-topaketak egiteko agenda biltzen ditu
HAZI zuzeneko merkataritza-misio bat egiten ari da Japonian, CAPRICE Europako proiektuaren esparruan, Euskadiko txakolinaren eta sagardoaren nazioartekotzea bultzatzeko, Japoniako merkatuan duten presentzia indartzeko eta parte hartzen duten enpresentzat merkataritza-aukera berriak sortzeko helburuarekin.
Misioa urriaren 15etik 22ra bitartean egingo da, eta Getariako Txakolina, Bizkaiko Txakolina eta Arabako Txakolina jatorri-deituretako zein Euskal Sagardoako zazpi upategik parte hartzen dute. Guztiek dute inportatzailea Japonian, eta sustapen-jarduerak, kontsumitzaileekin eta sektoreko profesionalekin zuzeneko harremana eta merkatu horretan duten posizionamendua sendotzeko merkataritza-topaketak uztartzen dituen agenda batean parte hartzen ari dira.
Discover Basque Wine, txakolinaren eta sagardoaren erakusleihoa Tokion
Misio honetako ekintza nagusietako bat Discover Basque Wine ekitaldia izan da, urriaren 17an, larunbatean, Tokioko Chinzanso hotelean egin zena. Topaketari esker, Japoniako publikoak Euskadiko txakolinak eta sagardoa gertutik ezagutu ahal izan zituen, produktua, haren jatorria eta proiektu bakoitzaren atzean dauden pertsonak ardatz izan dituen dastaketa-esperientzia baten bidez.
Ekitaldia ardo eta lurralde berriak ezagutzeko interesa duten kontsumitzaileei zuzendu zaie nagusiki, baita sommelierrei, jatetxe-arloko profesionalei eta saltoki espezializatuei ere, eta Euskadiko ekoizpen-lurraldeetan zeharreko ibilbidea eskaini du.
Parte hartu duten upategiek dastaketa-gune propioak izan dituzte. Bertan, beren produktuak aurkeztu, haien ezaugarriak azaldu eta beren ardo eta sagardoen historia eta berezitasunak zuzenean partekatu ahal izan dituzte bertaratutakoekin.
Esperientzia Euskadin zeharreko ibilbide baten inguruan antolatu da, ekoizpen-lurraldeen mapa baten eta dastaketa-pasaporte baten laguntzaz. Pasaporteak aukera eman die bisitariei upategiak ezagutzeko, beren iritziak jasotzeko eta produktuei eta Japonian dituzten salmenta-puntuei buruzko informazio osagarria eskuratzeko.
Ekintza honen helburua Japoniako kontsumitzaileek euskal txakolinari eta sagardoari buruz duten ezagutza handitzea izan da, produktuen kalitatea eta berezitasuna Euskadiko lurraldearekin, kulturarekin eta ekoizpen-tradizioarekin lotuz.
Japonian presentzia sendotzeko merkataritza-topaketak
Sustapen-ekitaldiaren ondoren, parte hartzen duten upategiak lan-agenda bat garatzen ari dira urriaren 18tik 22ra bitartean, bakoitza bere inportatzailearekin. Agendak merkataritza-jarduerak biltzen ditu, bai Tokion, bai, zenbait kasutan, Japoniako beste eremu batzuetan ere.
Topaketa horien helburuak dira tokiko eragileekiko harremanak sendotzea, merkaturatze-kanalak hobeto ezagutzea eta Euskadiko txakolinak eta sagardoak Japoniako merkatuan duten presentzia zabaltzeko aukera berriak aztertzea.
Azken kontsumitzaileei zuzendutako jarduerak eta topaketa profesionalak uztartzeak aukera ematen du produktuen ikusgarritasuna eta merkataritza-harremanen sendotzea elkarren osagarri gisa lantzeko.
CAPRICE II, Europako kalitatezko produktuen sustapena Japonian eta Hego Korean
Merkataritza-misioa CAPRICE II programaren esparruan kokatzen da. Europako kalitatezko nekazaritzako elikagaiak sustatzeko programa hori hiru urtez garatzen da Japoniako eta Hego Koreako merkatuetan, produktuen ezaugarri bereizgarriak, jatorria eta kalitate-estandarrak ezagutarazteko helburuarekin.
Programak kontsumitzaileei zein elikaduraren eta gastronomiaren sektoreko profesionalei zuzendutako sustapen- eta sentsibilizazio-ekintzak aurreikusten ditu, Euskadiko produktuen balioa nabarmenduz, hala nola txakolinarena, Euskal Sagardoarena, Kantauriko antxoarena eta hegaluzearena.
Testuinguru horretan, HAZIk txakolindegien eta sagardotegien parte-hartzea bultzatzen du Japoniako merkatuan, haien produktuak ezagutarazten, inportatzaileekin eta profesionalekin harremanak izaten eta euskal nekazaritzako elikagaien sektorearentzat interesgarria den merkatu batean presentzia komertziala sendotzen lagunduz.
CAPRICE proiektuan parte hartzen duten upategiak:
- Getariako Txakolina: Ameztoi, Talai Berri eta Mokoroa txakolinak.
- Bizkaiko Txakolina: Berroja eta Virgen de Lorea txakolinak.
- Arabako Txakolina: Artomaña Txakolina.
- Euskal Sagardoa: Zapiain.
Informazio gehiago Irekia atarian (Leiho berrian irekiko da)